政Whats噏:不滿加會審國歌法 泛民狂點人數

Spread the love

建制派轟民主派於會議上不斷點人數屬惡意破壞。(設計圖片)

今日(17日)朝早立法會有3個委員會同時召開,其中一個就包括近日頻頻開會嘅立法會《國歌條例草案》委員會。民主派議員對審議國歌法嘅法案委員會臨時加會大感不滿,所以就不斷要求響鐘點算會議法定人數玩嘢,最終仲搞到另外一個委員會只開咗半小時會就提早休會添。有建制派議員就批評民主派不斷點人數,係惡意破壞,仲話立法會唔係遊樂場。不過,建制派話唔係遊樂場啫,有人不知玩得幾開心喇。

立法會朝早唔止有審議國歌法嘅法案委員會開會,同時仲有工務小組委員會,以及審議規管電子煙法例嘅《2019年吸煙(公眾衞生)(修訂)條例草案》委員會。國歌法委員會原本明早(18日)都會開會,不過喺本周二就決定喺今朝8時45分再加開2小時會議,同喺今朝8時半開會嘅工務小組,以及有關電子煙嘅法案委員會撞到應。而有關電子煙嘅法案委員會開會時仲差啲因為唔夠開會法定人數而流會,好彩最後一刻都有議員趕得切入會議室。

咪以為夠人就可以正常開會。3個會一開始後,民主派議員郭家麒、范國威、區諾軒、陳志全就輪流喺唔同會議上要求點人數,搞到點人數嘅鐘聲響完又響,建制派穿梭唔到會議室,真係疲於奔命。至約早上9時15分,審議規管電子煙嘅法案委員會主席郭偉強就率先「投降」,宣布休會,令其餘2個委員會嘅會議總算可以順利進行,佢仲形容自己係「壯士斷臂」。而副主席葛珮帆就話立法會並非遊樂場,仲鬧爆民主派係惡意破壞會議,認為佢哋要負責任。

雖然係咁,民主派對點人數都係樂此不疲。以國歌法法案委員會為例,約2小時會議就先後點算6次法定人數,喺其中一次點人數期間,該委員會主席廖長江(Martin)同副主席張國鈞講︰「流一流國歌法我都冇乜所謂,等啲人警惕吓囉。」而Martin呢句說話就因為冇熄咪而被公開,仲搞到之後都要解畫。不過,如果Martin以為流咗會,民主派係會有所警惕,咁就可能有啲太傻太天真喇。

講開又講,民主派不時玩嘢、拉布,搞到會議進度緩慢,先至要加開會議,依家加開會議,佢哋又再玩嘢拉布,真係惡性循環喇。 

Leave a Reply

Your email address will not be published. Required fields are marked *